நிழல்படம்

பிரிந்து விட்ட காதலர்களை நினைத்துப் பார்க்கிறது 

பிணைத்து வைத்த கற்பலகை !

வலமிடமாய் கடக்கும் உயிர்வாழிகளை கண்டு நகைக்கிறது

குறுக்கும் நெடுக்குமாய் அடுக்கப்பட்ட தண்டவாள கற்கள் !

காலத்தின் கரம்கொண்டு ஓடு விலக்கி வானம்  வெறிக்கிறது  

வெயிலிலும் மழையிலும் இருளில் வாடிய கட்டிடம் !

ஆளில்லா நேரங்களின் அமைதியை ரசிக்கிறது 

நெரிசல் விரும்பிகளின் அருகே வசிக்கும் நடைபாதை !

அந்த நிமிடமும் வந்திடாதோ என எதிர்பார்த்து காத்திருக்கிறது 

கவனிப்பாரற்று துருவேறி நிற்கும் விளக்கு கம்பம் !

நீ எடுத்த நிழல் படமாதலால் உனைப் போலவே இருக்கிறது
          என்னால் புரிந்து கொள்ள இயலாததாய் !!!