கைப்பேசிக் காதல்

கடைசியாய் வந்த அழைப்புகளில் முதலாய் உன் அழைப்பு,

கவிதைக் களமாகும் உன் குறுஞ்செய்தித் திரை ,

தவறிய அழைப்புப் பட்டியலில் தவறாமல் உன் பெயர் ,

அழைப்பொலியில் உனது விருப்பப் பாடல் ,

சேமிக்கப்பட்ட செய்திகளில் உனதே மிகப் பலவாய் ,

சாதகமான எண்ணாய் உனது தொடர்பெண் .....

கைப்பேசி கையிலிருப்பதோ என்னிடம் - ஆனாலது

கையகப்படுத்தி வைத்திருப்பதோ உன் காதலை !

இயல் !

சமூகவியல் - நம் மாலை நேர சந்திப்பு ..

புவியியல் - உன் விழி வீசும் ஈர்ப்பு விசை ..

வேதியியல் - உனது மூச்சு முட்டும் முத்தம் ..

மின்னியல் - எனைத் தூண்டும் உன் தீண்டல் ..

கணிதம் - முடிவிலியாகும் என் இதயத் துடிப்பு ..

மொழியியல் - உன் இதழ் உதிர்க்கும் வார்த்தை ..

உளவியல் - உன் நினைவுகள் நிரம்பிய என் கனவு ..

விலங்கியல் - உன் அருகாமையில் சூடேறும் சுவாசம் ..

தொடர்பாடல் - உன் இரவு நேர செல்பேசிக் கவிதைகள் ..

தாவரவியல் - வெட்கம் பூக்கின்ற செடியாக மாறும் நான் ..

பொருளியல் - நீ கொடுக்கும் விலையற்ற காதல் பரிசுகள் ..

இயற்பியல் - உன் குரலில் தொனிக்கும் மின்காந்த அலைகள் ..என எண்ணில்லா

பாடங்கள் நம் காதலில் படிக்கிறேன் ! ! !

சுகம்

மென்றாலும் தின்றாலும் சுகம் ,

சுவை நீயானால் ...

கிடந்தாலும் நடந்தாலும் சுகம் ,

நிழல் நீ என்றால் ...

துடித்தாலும் நடித்தாலும் சுகம் ,

இதயம் நீயானால் ...

நின்றாலும் சென்றாலும் சுகம் ,

துணை நீ என்றால் ...

நிறைந்தாலும் உறைந்தாலும் சுகம் ,

மழை நீயானால் ...

வலித்தாலும் சலித்தாலும் சுகம் ,

காதல் உனதென்றால் ...

விரல்

கூட்டலில் பதினொன்றாவதாக நான் எண்ணிக் கொண்ட உன் விரல்,

விழுந்துவிடக் கூடாதென்று நான் பிடிக்கத் தொடங்கிய உன் விரல் ,

உடைந்து விடும் பொழுதுகளில் என் தலை கோதிய உன் விரல்,

நான் விம்மி அழும்போது என் விழி துடைத்த உன் விரல் ,

ஆனால் என் விரலோ ,

உன் முகம் கண்டால் நகம் இழக்கும்

உன் விழி கண்டால் முகம் மூடிக் கொள்ளும்

உன் நினைவுகள் எண்ணி கவிதைகள் கிறுக்கும்

உன் புன்னைகையில் தரையெங்கும் கோலமிடும்

இணையுமோ இவையிரண்டும் ....

பட்டாம்பூச்சி

உன்னை ஏந்தத் துடிக்கிறதே என் விரல் , அதனிடமா .. ?

உன்னில் உறைந்து நிற்கிறதே வண்ணம் , அதனிடமா.. ?

உன் வருகைக்காக காத்திருக்கிறதே தேன் , அதனிடமா.. ?

உன்னால் தாகம் தீர்த்து கொள்கிறதே மலர் , அதனிடமா.. ?

உன்னோடு சுற்றித் திரிகிறதே அந்த காற்று , அதனிடமா.. ?

உன்னிடம் மோகம் வளர்த்துப் போகிறதே மகரந்தம் , அதனிடமா ..?

வட்டமிடும் பட்டாம்பூச்சியே .... உன் காதல் யாரிடம்... ?

கடவுளின் துளி !!!

கண்மூடிக் கிடந்தாலும் கருவில் வாழும்
கடவுளின் துளியைப் பற்றியே கனவு காண்பாள் !

மண் தொட்டதும் மழலையின் உச்சிமுகர்ந்த பின்னரே

உயிர்வளியை அள்ளிக் குடிப்பாள் !

பண்பட்ட நிலமாய் குழவியைத் தாங்கி செந்நீரைத் திரித்து

பாசமிகு பாலாய்க் கொடுப்பாள் !

விண்வெளியை சோதிக்கும் உலகில் அவள் பிள்ளைக்கு

நிலவைக் காட்டி அமுதூட்டுவாள்!

எண்ணிலடங்கா கற்பனைகள் வளர்த்து கதைகள் சொல்லி

குழந்தையை தூங்கச் செய்வாள் !

தண்மையும் வெம்மையும் தான் தாங்கிக் கொண்டு தன்

வாரிசைக் கருத்தாய்க் காத்திடுவாள் !

பெண்மையின் பெருமையெல்லாம் ஒன்றாய்ப் பெற்ற

அவளைத் தாயென்று கூறினால் தவறாகக் கூடும் !!!

தெய்வமென்று சொன்னால் மட்டுமே தகும் !!!!!