பலமுறை எத்தனித்தும் செய்வதில்லை
வாசலின் இரும்புக்கதவுகளுக்கு எண்ணெயிடுதலை
நீ வருவதை நான் முன்கூட்டியே அறிய உதவுவதால் !!!
நிறுத்த முடிந்தாலும் விழைவதில்லை
சமையலறை குழாய்நீர் சொட்டுகளாய் வீணாதலை
தனிமையில் அந்த சத்தத்தை துணையாய் உணர்வதால் !!!
செய்யத் தோன்றினாலும் முனைவதில்லை
இரவெல்லாம் எரியும் மின்சார விளக்கணைத்தலை
நீயில்லா இரவுகள் இன்னும் இருண்டு அச்சமூட்டுவதால் !!!
உடல் விரும்பினாலும் ஏற்றுக்கொள்வதில்லை
குளிரூட்டப்பட்ட அறையில் கம்பளி போர்த்துதலை
நாம் பகிரும் போர்வை தனித்திருக்கையில் கனத்திருப்பதால் !!!
